تحذير العباد من بوليصة CIL

- منذ 4 سنوات تقريبا، عرض علي مندوب من شركة تأمين CIL التابعة لبنك CIB شراء بوليصة تأمين على الحياة، بحيث أدفع قسطا شهريا، يتم استثماره بأشكال مختلفة، أختارها أنا، والحصول على الفائدة بعد 10 سنوات، على أن يكون من حقي إلغاء البوليصة وتسييلها بعد 4 سنوات.

- لست ناجحا جدا في التوفير، كما إن عملي يوم فوق ويوم تحت، فكانت فكرة "التوفير الإجباري" بالنسبة لي مغرية، ولا أمانع بالطبع من الحصول على ربح ما في المستقبل القريب أو البعيد.. اشتريت البوليصة بقسط شهري 350 جنيه شهريا.

- منذ حوالي 5 أشهر، عرضت علي مندوبة جديدة من نفس الشركة، (الأستاذة ب)  زيادة قيمة البوليصة، وهو ما كنت أنويه بالفعل..  طلبت بشكل واضح وصريح ولا يحتمل اللبس زيادة قيمة البوليصة من 350 إلى ألف جنيه شهريا. أعطتني (الأستاذة ب) بوجه باسم عقد جديد، مضيت عليه مطمئنا بعد الاتفاق معها على ما أريد.

- كنت أراجع بعض المعاملات المادية بحسابي، فاكتشتف شيئا غريبا. أن البنك يسحب مني بشكل ثابت مبلغ 1300 جنيه شهريا. اتصلت بالبنك لاستفتسر عما حدث. اكتشفت أني ببساطة تعرضت لنوع من الخديعة. (الأستاذة ب) بدلا من أن ترفع قيمة البوليصة القديمة، أعطتني عقد بوليصة جديدة، وبنص العقد لا يمكنني فسخها إلا بعد 4 سنوات... بقيت بادفع قيمة بوليصتين، وبادفع المصاريف الإدارية مرتين، وأنا مش واخد بالي!

- طلبت من البنك فض الالتباس، فاتصلت بي (الأستاذة ب) بعد أقل من نصف ساعة، وأخذت تتغزل في مزايا البوليصة الجديدة ومميزاتها الرائعة. قلت لها، ليس هذا ما طلبته، ولا يهمني كمية الربح منها. يهمني أن تنفذي ما أطلبه أنا، وليس ما تقرريه أنت! قالت لي "أنت مضيت على العقد، يبقى بص عليه وشوفه. مينفعش تفسخ العقد غير بعد 4 سنين".

- السؤال الذي قد يدور في ذهنك الآن، عزيزي القارئ، ما الذي يدفع (الأستاذة ب) لهذا التصرف؟ أقولك... مندوبي شركات التأمين التابعة للبنوك، يعملون بنظام الكوتة، أي أن كل مندوب عليه أن يحقق ربح مادي شهري واضح، يصل إحيانا إلى 70 ألف جنيه في الشهر الواحد.

- كيف يتم حساب الربح؟ أقولك.. العميل الأولاني مضى عقد بألف جنيه في الشهر، يبقى 12 ألف جنيه في السنة.. العميل التاني ألفين جنيه في الشهر، يبقى 24 ألف جنيه في السنة.. يبقى كدة المندوب حصل على 36 ألف جنيه في الشهر.. وهكذا، لو مقدرش يكمل الكوتة، يتخصم من مرتبه، ولو قدر يكسب أكتبر من المطلوب، ياخد مكافأة (بونس).

- بعض هؤلاء المندوبين معدومي الضمير، فيوهمون العميل  بأرباح وهمية مستقبلية، أو يعتمدون على "عبط" العميل في عدم التدقيق فيما يوقع عليه (زي ماحصل معايا.. أنا فعلا عبيط إني طلبت منها حاجة، ثم مضيت على العقد وأنا متخيل إنه حيبقى نفس الحاجة اللي طلبتها).. أو أي حاجة تانية للحصول على أكبر كم ممكن من فلوس العميل، وتحقيق "التارجت".

- ما علينا.. ذهبت إلى بنك CIB اليوم، لغيت البوليصة القديمة نهائيا وأسلت المبلغ المودع بها. خفضت قيمة البوليصة الجديدة من ألف جنيه، إلى أقل قيمة ممكنة، 250 جنيه.. اتصلت بخدمة العملاء وطلبت منهم إلغاء كارت التسوق عبر الإنترنت وإسالة الوديعة المربوطة به.. خلال أسبوع هاكون أنهيت كل المعاملات المادية وصفيت كل الحسابات مع البنك. للأسف مضطر أخلي الحساب مفتوح لأن البوليصة الملعونة بتجبرني على ده، لكن مش حاخلي في الحساب أكتر من القسط الشهري 250  جنيه.. لحد مايعدي 4 سنين، أقدر أقفل خلالها الحساب مع البنك نهائيا.

- النهاردة حاكتب جواب أبعته لمدير شركة CIL  في التجمع الخامس بالوقائع التي حدثت، لا لشيئ غير عشان أقوله إن أنت مشغل معاك شوية ناس معندهاش ضمير.. نوع من "فش الغل" مش أكتر.. بالمناسبة، لو عايز تقدم أي شكوى، ابعتها على المكتب الرئيسي. أحد أصدقائي في البنك قالي صراحة إن الشكاوى ممكن تتقطع ومتروحش المقر الرئيسي من الأساس.

- - حاليا بادور على بنك جديد محترم أفتح فيه حساب، وفيه سيرفيس كويسة.. عارف إن ده صعب، خصوصا إن في غياب منظمات مجتمع مدني قوية لحماية المستهلك، فالواحد بيبقى ملطشة تارة للبنك، وتارة لشركة المحمول، ولأي شركة حقيرة تانية...لكن عموما، لو حد عنده نصيحة ببنك كويس، يا ريت يقولي في الكومنتس أو على تويتر.. شكرا :-)