أتمني ان تمر مليونية أو "اعتصام؟" 9 سبتمبر دون مواجهات عنيفة ودامية. لكن لاقدر الله لو ده حصل أتمني الجميع يكون مستعدا. الحاجات دي اتكتبت كتير لكن لحد دلوقتي شايف أعداد المتظاهرين "المستعدين" للاشتباك قلة معدودة في وسط مجموعات ضخمة غير مجهزة علي الإطلاق
- أهم حاجة الخوذة من أي محل صناعي. 5 أو 8 جنيه للبلاستيك وحوالي 350 جنيه للفايبر. المهم لازم خوذة للوقاية من الطوب وكسور ، الجمجمة. أرجوكم أرجوكم هاتوا خوذة، الشهيد محمد محسن مات بطوبة، ربنا يجعله آخر الشهداء ومش عايزين حد يموت بهذا الشكل تاني
- البيبسي يحوي نسبة ضئيلة من بيكربونات الصوديوم الذي يفسد تركيبة الغاز المسيل للدموع بنسبة قليلة جدا جدا. لا يعتمد عليه ولا علي الخل مع قنابل الغاز الجديدة. شراء قناع واقي من محلات الأمن الصناعي بالجمهورية مهم. القناع أبو 20 جنيه مخصص للاتربة وغير مؤثر إطلاقا مع الغاز
- لو تقدر ماديا، اشتر قناع غالي مزود بواقي للعين كمان. يبدأ ثمن القناع الجيد من 150 جنيه إلي ألف جنيه وطالع.حاول تجيب حاجة في النص. هناك أقنعة مهيئة لحمل فلتر واحد وأقنعة مهيئة لحمل فلترين، والثاني أفضل
- بعد شراء القناع يجب شراء الفلاتر. هناك أنواع مختلفة من الفلاتر، اسأل عن فلاتر الغازات السامة. الفلتر الواحد يتراوح ثمنه من 30 إلي 90 جنيه. متفكش الفلتر من الكيس إلا في بداية المواجهة لو حصلت لأن ليه مدة صلاحية خارج الكيس
- يمكن شراء قفازات حرارية من محلات الأمن الصناعي بثمن يتراوح بين 20 إلي 40 جنيه. هامة لحمل القنابل المسيلة للدموع ورميها بعيدا دون تعريض اليد للحرارة
- أحد تقنيات القضاء علي القنابل المسيلة وجود حاوية أو جردل جواه ميه. إلقاء القنبلة داخل الجردل وتغطيتها كفيل إنه يفسد مفعولها بنسبة كبيرة جدا
- هناك بدائل"رياضية" لبعض الأدوات دي. خوذة من بتوع الدراجات لحماية الرأس نظارة غوص لحماية العين جوانتي حارس المرمي لكرة القدم.
- حط في الشنطة مياه وعصير وبعض المأكولات الخفيفة وبعض الشاش والقطن ومياه الأكسجين لتنظيف الجروح
- في وسط إيمان الكثير من النشطاء بالكفاح "المسلح" والمقاومة العنيفة، قل الاهتمام بفرص تنظيم مجموعات للدفاع عن النفس بالأشكال دي
أرجو تنزيل وقراءة كتاب "الدروع الواقية من الخوف" بتأني لأنه يستاهل الاهتمام والتفكير فيمن يستطيع تنظيم دورات تدريبية لتطبيق ما به من أساليب لحماية النفس أثناء المظاهرات
No comments:
Post a Comment