عن الإنتاج الحربي ومحمد أبو العينين وفلوس الجيش

قبل انتخابات مجلس الشعب اللي فات، رحت أعمل تحقيق صحفي عن استخدام مرشحي الحزب الوطني للجمعيات الخيرية كستار لشراء الأصوات.

كان الاختيار لجمعية أبو العينين الخيرية لعضو مجلس الشعب محمد أبو العينين في الجيزة. قبل الانتخابات بـ3 أسابيع، أنشأت المؤسسة ما يسمي "السوق الخيري" في أرض فضاء ملك للمحافظة. فكرة السوق هي توفير مواد غذائية ومنزلية بأسعار رخيصة ومدعمة لأهالي المنطقة. وفي نفس الوقت، يكون البائعين من فقراء المنطقة ويكون لهم نسبة من الربح.

زي ماتوقعنا طبعا، كان كل البياعين هم ستات شديدي الفقر، أغلبهم مبيعرفش يقرا ويكتب، بيتكلموا بعفوية شديدة، وبيقولوا إن مؤسسة أبو العينين بتحفظهم قرآن وتديهم فلوس وتجمعهم وقت الانتخابات لعمل دعاية لرجل الأعمال في أوقات الانتخابات والمؤتمرات والذي منه. السوق استمر كام أسبوع لزوم الدعاية وانفض المولد وخلصت علي كدة.

الجزء اللي مكتبتوش هو الآتي: جميع السلع الغذائية والمنزلية اللي كانت موجودة في السوق كانت إهداء من مصانع الإنتاج الحربي. الجمعية رفعت يافطة لشكر القوات المسلحة، والقوات المسلحة أمرت بأنها تتشال فورا.

السلع الموجودة في السوق كله قيمتها متزيدش عن 20 أو 30 ألف جنيه. لكن الجمعية كانت بتدعي إن السلع تمنها 100 ألف جنيه، (الفرق بقي كان من عند الجمعية، ولو من عند توريدات الجيش؟؟؟).

طبعا ده بيفتح الباب أمام سؤال منطقي: ليه الانتاج الحربي يتبرع لجمعية ملك رجل أعمال من الحزب الوطني. هل كان ممكن يعمل كدة مع جمعية تنتمي لحزب تاني؟

طب إذا كان المشروع ده أصلا، وغيره كتير، مجرد وسيلة لاستغلال فقر الناس وشراء أصواتهم الانتخابية. مش ده يخلي مصانع الانتاج الحربي شريك في الجريمة؟؟

دي أسئلة مش حنلاقيلها إجابة، والحقيقة إن مافيش إعلام خاص أو قومي يقدر يطرح السؤال أصلا طول ماحنا عايشين في ظل دكتاتورية عسكرية، فيها الجيش أكثر قداسة من الذات الإلهية.

يسقط حكم العسكر